中環出更：手機墮叢林深處 黃偉鴻冒蛇咬拯救
唔少人趁啱啱過去嘅清明節小長假出埠旅行，香港中華廠商聯合會會董黃偉鴻（Ellis）同太太就去咗澳洲公幹兼觀光，點知喺著名熱帶雨林庫蘭達（Kuranda）發生咗一個小意外。Ellis掛住用相機捕捉靚景，一個唔小心，放喺褲袋嘅手機跌咗落三、四十呎深嘅叢林中，結果佢要冒住被蛇咬嘅風險落去「拯救」部手機，真係嚇到一額汗。
Ellis話叢林入邊冇行山徑，只有一條行人天橋貫穿，手機跌咗落去之後，因為沿途有告示牌講明有蛇出沒，所以原本諗住唔要部手機算喇，但由於太多資料喺手機度，未做備份，所以最後都係決定落去執。初初佢仲想學泰山咁，捉住條長樹枝游繩而下，但係被人阻止，結果要兜遠路，歷經爬坡、澗水，期間仲泥足深陷，總之千辛萬苦終於執番部手機，好彩都冇遇到蛇。難得佢仲講笑，話今次係好難忘嘅熱帶雨林體驗喎。
香港中華出入口商會副秘書長楊靜（Sally）同老公朱容基就去咗新加坡玩咗三日，事關有兩位好友嘅愛駒到當地參加盃賽，邀請佢哋一齊去玩同埋食好嘢，於是就同老公去行吓。
楊靜連食3隻斯里蘭卡蟹
期間一行人去咗一間當地好出名嘅蟹店，勁擦超級大隻嘅斯里蘭卡蟹。Sally笑稱，往年佢去幾次都食唔到，今次好運連連，連食三隻，八個人都食唔晒添！佢又話明年係佢結婚三十周年，所以老公話係時候放慢工作步伐，多啲時間去旅行，享受快樂人生。
卓妮