政情：王亞明高永文撞樣 手機識別App都搞錯
最近經常喺公開場合見到善德基金會副主席王亞明（Jeffrey），稍一唔留神，仲以為佢係食物及衞生局前局長高永文，事關兩人樣貌有七分神似，同樣戴住眼鏡，白淨斯文，身形亦差唔多，連微微寒背都似埋，社交圈中好多人都話兩人好相似。
附和「民意」話有啲似
早前兩人同時出現喺一個活動上，問高永文覺唔覺兩人似樣，佢就笑笑口話自己睇唔到，要影張相睇睇先知。影完之後即刻睇番，佢初初話唔知似唔似，但身旁啲人都起哄話似，佢就附和「民意」話都有啲似嘅。
Jeffrey笑稱真係有唔少朋友咁講，包括教育局前局長吳克儉，但自己就唔覺得似。講講吓，佢自爆用緊嘅手機有自動識別相簿中人嘅面孔，會進行歸類的功能，成日當錯高永文係佢添！連高科技都被佢兩個搞到亂晒龍，各位看官又點睇？