政情：同任區議員 姚嘉俊夫婦瞓唔着傾公事
辦公室係唔少愛情萌芽嘅地方，但兩夫婦如果長期連工作都係同一環境，會唔會好快悶呢？同為沙田區議員陳敏娟同姚嘉俊呢對夫婦似乎冇呢個問題，早排見到佢哋夫妻檔現身地區活動，講起二人瞓唔着會傾公事，好誇張喎！
陳敏娟話，佢哋連服務嘅社區都喺正隔籬，工作上唔少議題都相關，有時瞓唔着仲會喺屋企講公事。不過，二人都享受咁樣嘅生活，如果其中一個頂唔順，先會覺得辛苦喇。
話係初戀 老婆：冇聽過
姚嘉俊都加把口，話佢哋係靠地區工作認識，當年喺同一個辦事處做助理時共事，太太嗰陣廿歲都未到，之後又一齊選到區議員。兩個嘅紅線就係地區，難怪連話題都離唔開工作喇。姚嘉俊更大爆，太太係佢初戀，點知陳敏娟竟然話冇聽過喎，搞到姚嘉俊都冇佢咁好氣話「我講過o架」。當眾耍花槍，真係閃死人啦！