中環出更：搵外援宣傳 立會普通話團比例增
唔好以為公營機構嘅宣傳一定係自己做埋，原來立法會都有搵外援幫手宣傳。根據立法會秘書處最新就財政預算案回覆財委會嘅資料，原來秘書處曾聯絡旅遊發展局幫手喺「Discover Hong Kong」網站介紹立法會導賞團服務，立法會普通話導賞團嘅比例明顯多咗，遲啲會唔會好似大學校園咁，逼滿「打卡」嘅內地遊客呢？
訪客須登記 料唔會逼爆
秘書處嘅資料顯示，為咗向訪港旅客推廣立法會工作，曾經聯絡過旅發局，立法會普通話導賞團喺二○一六至一七年度仲係二百八十一個，佔整體嘅一成四，今個立法年度截至二月，即係共五個月，就係一百八十八個，佔兩成，比率明顯上升。至於粵語導賞團就由二○一六至一七年度嘅七成七，下跌至本年度首五個月只有七成。睇嚟普通話訪客比率明顯增加。
其實香港有唔少景點都被內地遊客逼爆，唔知立法會會唔會成為下一個災區呢？不過，訪客入立法會要登記，估計都唔會畀太多人入去啩！
卓妮