中環出更：孫明揚太太自認長老 拜山派弟妹代勞
雖然坊間成日話「未食五月糉，寒衣不入籠」，但近日天氣反常氣溫已逼近攝氏三十度，登山掃墓都要小心，唔好中暑呀。卓妮日前喺沙田馬場遇到教育局前局長孫明揚同太太鍾小芬拍住拖現身，講起春秋二祭會唔會登山時，孫太笑稱自己係家中「長老」，可以「控制」弟妹做代表去拜山咁話。
孫太解釋，自己係長女，父母過身後已是家中最大，基於宗教信仰唔會做傳統儀式，交畀弟妹處理就可以，坦言父母在心中。問起平時點應對咁熱嘅天氣，佢就話由細到大都唔怕曬，唔戴太陽眼鏡或帽，最多搽少少防曬霜，細個最鍾意夏天去海灘玩水抖暑添。
陳正欣籲唔舒服勿死撐
轉個頭撞到嘅香港鐘表業總會前主席陳正欣（Daniel），佢都話，冇天氣熱下拜山嘅煩惱，皆因先父母葬於家鄉潮安，唔一定要清明節正日掃墓，可以揀啱日子先揸車上去。Daniel細個係香港航空青年團成員，經常游走於山頭攀山涉水，訓練到自己好有紀律同有防範意識。佢話應對天氣熱，最緊要有計劃，要睇定天氣預報，留意氣溫會唔會太高，登山前再留意路線間有冇樹蔭，出發當日又要飲多啲水，如果曬到唔舒服就要休息抖吓，千祈唔好死撐喎。
另外，和富社會企業會長李宗德亦唔怕曬，坦言小時候最愛游水，就算曬到背脊起水泡亦照落水。不過，佢亦話長大後就唔落水，改為行路，咁就可以選擇避開太陽，閒時去健身室操吓，相反太太鍾意打網球，有時天氣太熱都會提點吓佢，記得飲水兼搽防曬喎。認真錫太太！
卓妮