政情：公民講場：選舉處失冊手尾長 譚志源走得快避孭鑊

選舉事務處（選舉處）被揭遺失二○一六年立法會選舉嘅選民登記冊，隱瞞兩年半先證實事件，引起各界嘩然。現任政制及內地事務局局長聶德權尋日現身「撲火」，直指選舉處冇通報事件做法不能接受，並要求提交報告。追源溯始，聶德權嘅上手，即時任政制局局長譚志源先責無旁貸。譚咪以為離開咗政府呢個熱廚房，就走得快好世界唔使孭鑊，其實佢理應要現身講清講楚，究竟於一七年中離開政府前，有冇收過選舉處任何知會或通報「失冊」，好讓各界可以抽絲剝繭，真正還原「失冊」事件真相。