政情：細個唔跟爸爸去活動 鄭泳舜囝囝照辦煮碗
做父母嘅就算唔寄望仔女飛黃騰達，至少都希望佢哋做正確嘅事。立法會議員鄭泳舜（Vincent）尋日話，佢由六、七歲起爸爸已經成日捉佢出席唔同活動，希望佢去服務社區，佢初時都會乖乖哋跟埋去，不過到咗青春期就有啲反叛，又覺得啲活動好悶，於是就成日諗借口唔去。依家佢已為人父，點知就到佢啲囝囝請佢食檸檬喇。
12歲大仔踏入青春期
Vincent依家終於明白爸爸當年心情，事關佢三個仔依家分別係八歲、十歲同十二歲，大仔開始踏入青春期，識得請佢「食檸檬」。有時Vincent覺得有啲活動好有意義，想叫埋三個仔一齊參與，但佢哋一時話太早，一時又話放假唔想去，點都唔肯畀面，真係「當時父母念，今日爾應知」喇。
議員成日要出席唔同活動，點樣定下優先次序呢？Vincent就話首要考慮係時間，一定唔可以影響到自己嘅工作，其次就係以自己跟進開嘅議題優先，至於其他有意義嘅活動佢都會盡量出席咁話。