政情：男士「唔得」飲鹿鞭酒？ 陳健波請教女醫師
都市人生活壓力大，如果影響埋生育真係幾頭痕。保險界立法會議員陳健波（波哥）早排就特登請教女中醫師，問到坊間一直有指男士「唔得」係因為腎有事、腎虧，係咪飲鹿鞭酒壯陽就解決到，該中醫師即刻澄清鹿鞭酒同蛇酒都唔可以亂咁飲，否則可能會導致燥熱、失眠，甚至影響體質。
波哥咁關注有關問題，唔通佢有呢方面嘅煩惱？非也，其實係波哥邀請咗一位女中醫師一齊拍短片，為大家講解男士同女士常見嘅健康問題啫，波哥仲知道有啲男士好喜歡飲鹿鞭酒呢啲偏方，不過飲咗之後身體反而更差，所以佢就代表一眾男士問吓中醫師。
正如該女中醫師所講，男士因腎虛不育嘅以老年人同大病後人士為主，年輕一輩多數係因為精神壓力、工作忙碌同埋與飲食習慣有關，唔怪得波哥話好多人都有誤解，仲叫男士們唔好「亂嚟」喇。
嚟緊探討更年期
波哥又話，過往佢拍短片講過好多市民關注嘅常見健康問題，例如生育難問題、女性經期飲乜嘢好等，嚟緊都會請中醫師講吓女性更年期及安胎等問題喎。