政情：離任在即多怨氣 馬時亨一笑置之

馬時亨話，香港以往好爭氣，成為國際金融中心，但今日就變成怨氣之都，因為人工追唔上通脹。而佢都一樣有怨氣，好似早前有指佢去打高球，但佢已幾個月冇掂過球桿，早排嘅「OK論」又遭移花接木到以為佢講緊沙中線工程等。不過佢就話會選擇一笑置之，咁樣個人都開心啲，仲反問唔通要去告人，又嘥錢又傷身咁話。

金澤培自爆係宅男

港鐵行政總裁金澤培上任幾日，佢話主要係聽吓員工訴求，又自爆興趣係打機同行黃金商場，真係睇唔出佢係宅男一名。不過，佢就話上任以來都未有打機，希望工作上軌道後可以抽到時間。

而港鐵亦趁聚會介紹新吉祥物「鐵仔」。「鐵仔」嘅設計係參考咗港鐵新購入市區新列車，該款列車由中國製造。而「鐵仔」亦將會喺暑假於港鐵站海報同標語亮相，甚至會喺港鐵站宣傳活動親自現身添。