中環出更：十幾年前收山湊仔 陳姚麗妮為新抱復出做慈善
做得慈善唔止要出錢，好多時都要出埋力，時間同體力少啲都唔得。東華三院早前舉行就職活動，總理陳姚麗妮十幾年前就曾經做過一年總理，之後就冇再做，到今年先再加入。原來佢當年加入東華，係源於老公陳紅天同埋當時其他東華成員一齊游說佢加入，不過加入咗一年就懷有細仔陳麒宇，考慮到要照顧三個仔，所以就決定退落嚟，專心照顧家庭咁話。
至於點解依家又「復出」，陳姚麗妮就話係要頂替佢大新抱陳黃燕君，事關陳黃燕君啱啱卸任東華總理，原因同佢當年一樣，都係因為有咗BB，所以就想退落嚟照顧家庭。陳姚麗妮又話，依家佢幾個仔已經長大，唔使再花咁多時間照顧，所以就決定再加入東華，仲話會趁啲仔放假時帶埋佢哋一齊參加活動，感染吓佢哋做多啲善事，希望佢哋將來可以接棒，繼續做慈善喎。
總理莊紫祥今年係第一年加入。佢話過往其實都有做善事如捐款等，不過落手落腳參加就係第一次，仲話呢個決定一啲都唔容易，事關幫手搞活動需要投放好多時間，佢都考慮咗好耐先作決定。問到怕唔怕冇時間陪家人，佢就話唔擔心，因為已經做好準備，如有活動都會帶埋家人一齊出席參與。
蔡榮星自爆叫阿仔「大佬」
至於主席蔡榮星就講起點樣推動青少年發展，佢話今時今日同年輕人溝通嘅方式已經變咗好多，唔單止好多時都要透過電子產品溝通，方式都已經今時唔同往日，佢仲自爆會稱呼個仔做「大佬」，同上一代較嚴格嘅教仔方法完全唔同喇。
至於副主席文頴怡都話，佢有朋友曾經都投訴過同個仔身處喺同一個單位入面都要用手機通訊程式溝通，真係隨住時代唔同，都冇辦法喇。
卓妮