選舉事務處喺二○一七年特首選舉遺失咗兩部分別載有一千多名選委姓名同三百萬名地區選民個人資料嘅手提電腦，惹來社會關注選民私隱外洩，當時立法會議員都有跟進。點知原來呢次都唔係唯一一次，選舉事務處尋日就被踢爆喺二○一六年立法會換屆選舉後，唔見咗選民登記冊，仲要隱瞞咗超過兩年。選舉事務處每到選舉年都呼籲市民登記做選民，但又接連遺失選民資料，市民日後又點會對選舉事務處有信心呢？究竟選舉管理委員會主席馮驊幾時先瞓醒，去做好監督工作呢？佢真係要好好解釋下喇。
