政情：滑雪跌斷左腳韌帶 馬陳家歡唔覺痛
香港人成日都去日本旅行，如果撞正冬天，就好多人都會順便滑雪。東華三院前主席馬陳家歡日前出席活動時揸住拐杖，一問之下原來佢就係早幾個星期去日本滑雪時受傷，佢話當時貪得意學人哋喺個山丘位起跳飛出去，結果落地就受咗傷，但係佢當時不以為意，只係覺得有少少痛，以為冇問題，完全唔知自己左腳韌帶斷咗。
做完手術仲笑得燦爛
咁到底佢幾時先發現左腳韌帶斷咗呢？馬陳家歡話，當時佢哋繼續照常旅行，之後返到香港都未覺有事，直到第二次出發再去日本購物，發覺自己隻腳有啲腫，跟住先走去睇醫生，結果發現係左腳韌帶斷咗，所以佢啱啱先做完手術冇耐咁話。不過睇馬陳家歡仲笑得咁燦爛，難怪啲人事後都話佢老公馬浩文好幸福啦，事關佢老婆隻腳傷到咁都仲笑得出，認真樂觀喇。