中環出更：力證先提智能泊車 田北辰暗批有人抽水
香港泊車位不足問題一直為人詬病，政府早前終於提出智能停車場計劃，以解決泊車難問題。不過往往喺政府推出新措施之後，議員為咗展示工作成果，就會打着「成功爭取」旗號去展示政績，部分人更會被質疑係「突然爭取」。立法會議員田北辰（田二少）就喺社交網站列出其提出討論引入智能泊車系統嘅時序表，叫大家自行判斷邊個先係成功爭取，唔知佢認為邊個喺度「抽水」呢？
身兼荃灣區議員嘅田二少喺社交網站發貼，話有人問到提出引入智能泊車系統同大幅增加車位「唔係你喺區議會提出先嘅咩？但成日見到有人抽水話成功爭取」，所以佢就列出時序表，講番佢前年十一月已喺區議會嘅交通及運輸委員會提交相關議程。
稱有post有真相
佢又提到，喺去年一月同八月都先後向運輸及房屋局局長陳帆及政務司司長張建宗提出引入智能泊車系統，並希望擴展到其他區，仲曾經喺社交網站分享過建議，直言︰「有Post有真相」咁到底邊個抽水？佢就話作為原創者只係提醒大家其他係二次創作，費事指名道姓指斥其他人。其實田二少相信市民眼睛係雪亮嘅話，都唔使咁嬲豬嘅。
卓妮