中環出更：麻疹肆虐冇有怕 陳李妮為B女設防護網
冬季流感疫情剛剛緩和，又輪到爆發麻疹疫症，搞到人心惶惶。新手媽咪博愛醫院永遠顧問陳李妮（Lily）就好淡定，雖然愛女Phyllis只得十個月大，仲未打得麻疹針，但係自從囡囡出世之後，佢同老公就為BB架起高規格「防疫網」，所有身邊嘅人包括司機、工人一早已打齊流感、百日咳、麻疹及肺結核等疫苗，所以今次爆發疫症都冇有怕喇。
Lily講起防疫網，話唔單止身邊嘅人要打齊晒疫苗，親戚朋友見Phyllis前都要洗手、消毒。Lily仲笑笑口話：「以為咁就可以掂到BB？錯喇！」原來大人仲要喺膊頭披一件專用毛巾隔開先可以抱BB，但都唔掂得B女嘅面同埋頭，即係唔可以錫錫，只有佢同老公先可以喎。咁嚴格，有冇朋友投訴o架？Lily就話冇，反而個個都話佢做得啱。見佢講起個女就停唔到口，幸福寫晒喺臉上。
林麗儀選擇留港防中招
今次麻疹爆發嘅重災區係機場，博愛總理楊亞媛經常為公務周圍飛，幾乎每星期都要飛一次，佢話都有啲驚，不過抵抗力一向都幾好，平時都有注意衞生，加上細個打過疫苗，所以都應該冇事。而從事電影業嘅總理林麗儀就話，自己嘅工作唔使成日出埠，依家更加會選擇留喺香港喇。
逢親有疫情爆發，衞生防護中心就忙到飛起，三年前卸任嘅前總監梁挺雄依家係香港中文大學中醫學院院長，照計今次疫情唔關佢事喇。不過佢就笑笑口話都仲好關注事態發展，因為當年佢修讀公共衞生碩士時就係研究麻疹，跟足麻疹幾十年，形容自己係半個麻疹專家咁話。
卓妮