政情：囡囡生龍鳳胎 馬時亨再做外公

馬時亨嘅長女馬露明同丈夫劉仲恒醫生已育有一子，而喺前日一對龍鳳胎出世，母子平安。咁龍鳳胎改咗名未？改咗喇，叫劉智恩 （Elizabeth Grace）同劉智灝（James Josiah），名字寓意神賜嘅恩典同智慧。

搖身一變成為三孩之父嘅劉仲恒就話，希望一對小朋友健康快樂咁成長，佢身兼促進母乳餵哺委員會成員，同太太一向支持母乳餵哺，因此將會身體力行，為一對龍鳳胎提供最好嘅營養同保護。

哥哥彈結他 迎接細佬妹

劉仲恒又透露，三歲嘅長子劉智恒（Christian）喺過去幾個月努力練習結他，打算用音樂嚟歡迎一對弟妹返屋企咁話。