政府亂揈公帑一直為人詬病，每次爆鑊都係「沒有最離譜，只有更離譜」，好似尋日立法會工務小組委員會審議元朗橫洲興建公屋項目時，議員朱凱廸就發現其中一條只長二十米嘅地底行車隧道竟然要造價兩億元，而用途只係唔想影響原居民祭祖使用嘅地面行人路，直斥「一米一千萬」係「太癲」，話諗唔到點解路面唔可以人車共用。呢單嘢確實太離譜，究竟運輸及房屋局副局長蘇偉文係受咗鄉郊人士壓力吖，抑或係諗住啲公帑用之不盡，所以亂咁揈都唔怕呢？
