政情：招國偉獲任房委會委員

招國偉對房委會工作並不陌生，事關過往曾擔任房委會轄下嘅資助房屋小組委員會委員。而二十六名房委會非官方委員中，就繼續有兩名民建聯成員，分別係立法會議員張國鈞同柯創盛，另外其他政黨好似工聯會、民主黨等都各有一名代表獲委任，全部都係再獲委任嘅委員。

另外，大律師公會前主席譚允芝亦再獲政府委任為通訊事務管理局（通訊局）主席，新任期同樣喺下周一展開，為期兩年。譚允芝本身喺去年三月先獲政府委任，出任主席剛滿一年，當時佢係接替漏報持有股票利益而辭職、上任未夠一年嘅前主席王桂壎，而通訊局今次亦委任多兩名新成員。