政情：譚文豪兩度肥佬 終考到的士牌
本身係飛機師嘅立法會議員譚文豪（Jeremy）約一年前獲委任為的士服務質素委員會委員，對於有指的士牌難考，為咗探究原因，佢就決定自己考埋一份，不過佢就「肥佬」咗兩次，直到考第三次先合格。佢尋日拎住張證書，直言︰「覺得自己威過牛津畢業」，仲話遲啲搵時間租番架的士，揸番一兩更咁話。
質疑部分考試內容過時
Jeremy考的士牌並冇經任何駕駛學校，只係溫習運輸署提供嘅資料，對於要記資料中六百五十個地標，佢就大嘆好難記，因為好多地點根本冇去過，而考牌要考嘅有關交通嘅條例，由於一百題中只可錯五題，所以難度都好高喎。
雖然總算合格，但佢都質疑考試內容部分過時，事關今時今日只要上網，各地標就隨手可查到，冇必要去背地標位置，認為應改為考路線，即由A地點去B地點應該行邊條路或邊條隧道，又或者考吓識唔識用地圖等，咁樣就比較實際喇。