政情：火爆立會 田二少轟點做主席 易志明還擊：下次你選
立法會議員田北辰（田二少）喺今個立法年度放棄連任財務委員會副主席，結果連上年度出任嘅鐵路事宜小組委員會主席一職都不保，被航運交通界議員易志明取代其出任小組委員會主席。尋日小組開會，田二少同易志明就爆發口水戰，田二少不滿易主持會議嘅手法，包括畀自己政黨議員第一個提問、又容許泛民主派議員超過咗發言時間仲可追問等，直斥易︰「咁樣做主席嘅！」易就反駁︰「咁你下次選（主席）啦！」真係火花四濺。
話說尋日鐵路事宜小組討論港鐵沙中線項目紅磡站擴建部分及其鄰近嘅建造工程調查委員會中期報告，易志明喺討論有關議題時就講明，每位議員發言時間得四分鐘。當時排喺田二少前面發言嘅泛民議員陳淑莊（Tanya），就對出席會議嘅港鐵候任行政總裁金澤培窮追不捨咁提問，足足問咗超過五分鐘，惹來田二少不滿。田二少發言時就投訴Tanya發言過晒時間，仲同易講︰「畀番五分鐘零六秒我。」但遭易拒絕。
發言時間被指大細超
田二少於是質疑，點解易畀其他議員發言可以超過五分鐘，但佢就唔得，直言︰「咁樣做主席嘅！」點知易就話︰「咁你下次選（主席）啦！」此言一出，唔止田二少聽到之後仲勞氣，在席其他議員都即刻「嘩嘩」聲。田二少仲話︰「嘩！大我添呀你，我唔夠你多票，兩個自由黨排隊第一個問，真係好嘢。」
黨友率先提問惹質疑
田二少會後接受查詢時話，佢不滿嘅並唔止易志明畀Tanya問多一分鐘，而係易作為小組主席，自己問完又畀與其同屬自由黨嘅飲食界議員張宇人（Tommy）第一個問先，質疑對方係咪咁叻第一個撳到掣發問，而佢哋問完後負責回應嘅官員同港鐵人員就「照稿讀」咁回應，究竟係咪同政府及港鐵「夾過」，仲話自己以前做主席從來未試過第一個發問，認為易嘅做法令人覺得觀感唔好。
易志明就認為，田二少所講嘅只係「佢自己嘅感覺」，並非事實，又話Tommy只係咁蹺排到第一個，而佢自己嘅提問都有泛民議員幫手追問，所以並非「夾埋」，只係田二少個人猜想。不過，對於議員發問超時，易都話下次會同超時後仍追問嘅議員講清楚、「停咗佢（發言）」咁話。原來唔單止港鐵列車會相撞，兩個建制派議員都會硬撼嘅！