政情：宣布打敗仗 葉劉疑染流感
近來流感活躍程度持續下降，但就開始爆發麻疹，真係「一疫未平，一疫又起」。現年六十八歲嘅新民黨立法會議員葉劉淑儀，前日因發燒缺席行政會議，病徵似係流感，醫生已處方抗生素同特敏福兼要佢抖番幾日，尋日佢亦因病未能出席立法會會議。
稱去緊考察團已感不適
葉劉尋日朝早喺社交網站發貼，話自己打敗仗，仲上載張有藥有口罩嘅圖。佢話上周到格魯吉亞同匈牙利參加為期六日嘅商務考察團，當地氣候寒冷，加上早晚溫差甚大，一唔小心就冷親嘞！當時已感到身體不適，不斷流鼻水同出現感冒症狀。
考察團結束訪問返港後，佢就咳嗽同流鼻水加劇，周一晚開始發燒，前日求診時更發燒達三十九度，醫生即時開咗抗生素同特敏福等藥，食藥後高燒雖稍稍降低，但仍然肌肉痠痛，覺得好疲累，而醫生亦再三叮囑佢最少休息三日，要食晒啲藥。佢仲話依家只好臥床休息，希望身體盡快復元，重投工作。