政情：矇查查頸骨移位 梁耀忠出街要戴箍
呢排立法會經常發生肢體碰撞嘅情況，而喺混亂中，有議員同保安人員都有報稱受傷，今日見到街工嘅議員梁耀忠（阿忠）變咗「頸箍男」，乜佢都被波及咩？但呢次唔怪得人喎，只能怪自己。
要戒口避食酸辣
點解變咗頸箍男？點整親o架？其實阿忠都矇查查，話可能係無情力啩，佢上個禮拜覺得頸背痛，於是去照咗X光，發現頸骨有一節輕微移位，隨即搵中醫師睇吓，跟住中醫師就幫佢推番正啲骨，而為免出街容易有碰撞又受傷，中醫師叫佢出街要戴頸箍保護，所以佢由周一起就開始戴，話要戴兩至三個星期喎。
為咗快啲好，當然要戒口。佢話好彩唔多食酸同辣嘅食物，所以戒口完全冇問題，反而係呢幾日天氣轉熱，佢出汗多，所以要搽番啲爽身粉，最難搞係夜晚瞓覺，事關必定要面向天花板嚟瞓，唔可以打側瞓，成晚要就住就住，搞到無覺好瞓。