政情：白鴿黨疑派過期食物 激到街坊爆粗

胡志偉喺啟業邨嘅地辦日前派發食物。（讀者提供）

又臭又饐 硬到似磚

有市民投訴，用咗成粒鐘排隊等民主黨（白鴿黨）議員胡志偉位於啟業邨嘅辦事處外拎食物，當時社區主任尹家謙都在場，但拎完都唔知咩嚟，好似一舊磚咁硬，有街坊本住好奇心拆開，竟然傳出饐味同臭味，搞到唔少街坊都鬧鬼，仲話揼都揼唔切，唔少人激動到爆晒粗咁話。

• 有市民投訴獲白鴿黨派發嘅愛心食物發臭（下圖），懷疑已經過期（上圖）。

截止日期係舊年9月

而食物嘅紙皮盒上就有簡體字標籤，寫住要「保持凍結再加熱」，唔知班街坊係咪唔知要翻熱而惹起誤會喇！不過標籤上嘅截止日期係舊年九月廿七日，就惹來派發過期多時食物嘅疑惑囉。胡志偉接受查詢時就話要問番尹家謙，始終社區嘅事由番佢哋處理，但我哋曾經多次聯絡尹家謙，至截稿前都未獲回覆。