政情：唔約開會玩自拍 副局政助惹議員圍插

曾喺政府熱廚房出任過保安局局長嘅立法會議員葉劉淑儀（葉劉），就喺尋日立法會大會提出檢討副局長及政助職位嘅口頭質詢，終惹來跨黨派議員一齊開腔怒斥一眾副局長及政助，包括鬧爆財經事務及庫務局副局長陳浩濂及該局局長政助楊寶蓮冇影、發展局政助馮英倫唔安排會面、商務及經濟發展局副局長陳百里只識玩自拍等。有議員更直言，唔知佢哋上任後做過乜添！

容海恩怒問：有冇做好份工

尋日大會上，立法會議員容海恩（Eunice）代其黨友葉劉就副局長及政助事宜質詢政府，仲彈副局長及政助做嘢唔掂，詢問政府會否引入客觀入職條件或提供培訓。負責回答質詢嘅政制及內地事務局局長聶德權話，政治委任制係為咗靈活吸納體制內外嘅人才，認為委任制下嘅官員必須緊貼社會脈搏，幫助游說及聯絡政黨同各界別，政助更為局長提供政治分析，而每屆都由特首主持嘅聘任委員會討論以廣納賢能。

Eunice聽完聶嘅「官腔」答覆即指出，現屆政府上任後，財庫局推行十八條條例草案，但佢同葉劉都冇收過陳浩濂或楊寶蓮電話同短訊，當局亦冇講過有關政策或公共行政開支建議，怒問佢哋有冇做好份工，有咩改善方法。

商約開會被耍 譚文豪嬲爆

而民主派嘅議員譚文豪（Jeremy）亦揶揄馮英倫「極之出色」，皆因佢曾就九龍東一幅用地改劃邀約局方見面，起初託助理致電馮就被「耍」，到佢親自致電發展局局長黃偉綸及副局長廖振新，點知又轉咗畀馮處理，而馮仲要話佢唔係持份者，所以冇安排會面。Jeremy質疑政助係咪可以惡到咁，權力大過局長，直斥政助係專責破壞行政立法關係。

議員麥美娟（Alice）就不點名批評某副局長，話有啲副局長積極出席活動兼成日玩自拍，寸爆政府訓練係咪包埋自拍，又話該副局長負責「好重要嘅條例」，但業界都冇聽過佢介紹政策，質疑對方點同業界溝通。據了解，Alice講嘅政策就係由商經局負責嘅美容和健身服務消費合約設冷靜期，陳百里自然走唔甩。

議員咁勞氣因有關職位人工高，但做嘢就冇影，連班議員都搞唔掂，政府真係要諗計，免得再請啲「宅男宅女」激嬲議員喇。