中環出更:食麵5分鐘潘兆平為趕返立會開工

都市人生活忙碌,連食晏都急、趕、快,代表一眾打工仔階層嘅立法會勞工界議員可謂相當「貼地」,連食晏都同一般打工一族一樣匆匆忙忙。前日佢喺金鐘海富中心一間連鎖快餐店食晏,見佢五分鐘就KO咗碗麵,仲一邊食一邊睇手機,之後用牙籤撩完牙就急急腳走人。佢咁趕,究竟去做啲乜呢?

潘兆平前日下午二時許就喺海富嘅快餐店現身,仲點咗一碗麵同一杯熱檸茶,不過好快就食完走人。佢話因為上午喺立法會開會,下午亦要返立法會做嘢,但又要去運輸署續車牌,所以惟有拿拿聲食完走人咁話。佢之後去咗運輸署,逗留約十分鐘辦理完文件就離開喇!

林健勳話科技有助管理公司

冇幾耐、以製造塑膠小黃鴨玩具聞名、有「中國變形金剛之父」之稱嘅林亮亦坐咗喺嗰間連鎖快餐店,仲同一個男人雞啄唔斷咁傾偈傾咗大約一個鐘,呢個男人咪就係佢個細仔、立法會議員林健鋒胞弟林健勳喇!林健勳一向較少公開露面,林亮即刻向卓妮介紹。林健勳話香港人工作壓力大,食飯都係急住食,不過依家有手機通訊程式,又可以視像通話,科技帶來方便,佢哋管理公司都唔成問題喇。

卓妮之後又喺金鐘中信大廈一間快餐店見到保良局副主席陳正欣喺度飲緊嘢,陳見到卓妮就行埋嚟,佢話因為中午有事到政府總部開會,見開完會距離下午嘅工作仲有一小時,所以就坐低飲杯嘢先。佢又話平時工作忙碌,都只能偷時間食飯,而且因工作需要,要兩部電話跟身兼響個不停,夜晚又多應酬飯局,真係要等到放假陪太太行街,先至減到壓咁話喎。

卓妮

第一手消息請下載on.cc東網iPhone/iPad/Android/Windows Phone Apps