建制派為抗衡民主派喺立法會拉布，去年提出修改《議事規則》並獲通過。最近立法會議事規則委員會開會，商討修改《議事規則》第二波，包括以「累進制」處理行為極不檢點嘅議員，即議員首次被逐就禁止出席會議一次，第二次被逐就「禁賽」兩次，餘此類推。有議員爆料，議規會唔止研究緊禁賽，仲研究緊收緊議員引用《立法會（權力及特權）條例》（特權法）提出議案嘅準則，實行唔畀泛民濫用特權法。
據了解，立法會秘書處就議員提出特權法議案同議員議案做咗統計，發現今屆立法會提出特權法議案嘅次數已有廿一次，而一般議員議案方面，第四屆立法會平均每位議員可每年提一次、第五屆已減至兩年提一次，而今屆立法會情況就仲差，平均每位議員兩年都提唔到一次議案。有建制派喺會上批評，民主派成日濫用特權法提議案，令優先次序較後嘅一般議員議案積壓，情況並唔理想，故希望設限，在場民主派當然反對。
由於現時議員可自行喺立法會大會提出特權法動議，有民主派議員就估計如要設限，或會要求議員先喺內務委員會提出特權法動議，待內委會通過後先可以喺大會提出。
如此方案成事，泛民提出特權法動議嘅機會將會大減。不過今年正值區議會換屆選舉，建制派或會怕去得太盡，引起民意反彈，所以暫時未必會輕舉妄動。