中環出更：做官交白卷 張炳良卸任即指手畫腳
近年運輸及房屋局屢爆事故，搞得頭嚟又醫唔到腳，認真係鑊鑊新鮮鑊鑊甘。依家無官一身輕嘅運輸及房屋局前局長張炳良，尋日出席一個講座時就逐項點評政府運輸政策，由港鐵唔應該上市，講到三隧分流應該全部都加價，紅隧仲係必然要加，又希望現任局長陳帆「有吉士（Guts）」推動電子道路收費，仲講到「香港冇基建係大白象」。講到咁輕鬆，咁又唔見張炳良在任時去做嘅？
指香港冇基建係大白象
已重返教育界嘅張炳良終可以輕鬆以理論分析時局，尋日喺教育大學講「公共交通和運輸基建的政治」。佢以巴士線做例子，話依家好多巴士線可以合併或重組，有好大空間去改進，但做局長嘅經驗係一話重組地區就會嘈，簡單到移開巴士站都唔得，慨嘆運輸問題因為有政治因素而做唔到。
佢又話港鐵上市係錯，當官方委任董事坐入董事會就受到法例規管，要顧全小股東利益，唔可以亂咁話減價就減價，作為規管者及董事，有時要避免利益衝突避席，好多嘢都做唔到。佢更提到基建不時有超支同延誤，但原來全世界都有，香港好彩冇基建係大白象，好似曾被批評係大白象嘅西鐵線已經好多人搭喇喎。
卓妮