中環出更：三三四學制拖累血庫 何仲平始料不及
醫療衞生係港人好關心嘅事，卓妮日前去咗香港醫學會（醫學會）一個活動，話題都離唔開呢個範疇。依家時不時都有呼籲市民踴躍捐血，醫學會會長何仲平話影響血庫存量嘅因素有好多，譬如過年期間避免「見紅」不吉，部分人就會打消捐血嘅念頭，但十年前實施嘅三三四學制竟然都波及到捐血者嘅來源，就令好多人始料不及。
何仲平話過往中學係搵志願者捐血理想嘅場所，按必須年屆十八歲先可以捐血嘅規定，能夠捐第一滴血嘅學生絕大多數都已經讀到中七，但實施教改之後，中六之後就上大學，由於大學生活多姿多采，且課堂約束亦無中學咁嚴謹，要凝聚一班大學生捐血，較集中一班中七學生要低效好多，捐血人數亦難免要打折扣。
林哲玄撐全面禁售電子煙
佢仲話見過最惡劣嘅時候，血庫只得三日存量，但幸好近一、兩年港人對捐血救人嘅意識高咗，血庫先見底回升。
提及近日社會上對禁售電子煙嘅爭議，醫學會副會長林哲玄認為電子煙嘅危害絕對較傳統嘅香煙要大，理由係電子煙具有好強嘅偽裝性，因為電子煙嘅味道選擇極多，生果、汽水同雪糕等上萬種味道，導致二手煙嘅氣味難以察覺，假如一家大細到戲院睇戲，而場內又有人吸食爆谷味嘅電子煙嘅話，咁就全家都不知不覺咁食足個幾兩個鐘嘅二手煙，為免持續多年嘅禁煙運動功虧一簣，佢話全面禁售電子煙係有必要嘅。
同場仲有本身係眼科醫生嘅醫學會會董冼佩儀，對於點樣配眼鏡，佢話鏡片無論係乜嘢品牌功能基本一樣，所以佢配眼鏡都係以經濟為原則。
卓妮