政情：囚犯餐雞翼大細超 譚文豪求增撥款
「燒雞翼我鍾意食」，唔少香港人都鍾意食雞翼，但又有幾多人會介意雞翼嘅大小呢？近日公務員間瘋傳一張由立法會議員譚文豪（Jeremy）就預算案有關懲教署開支嘅書面問題，內容提到經常有在囚人士反映，署方派發嘅雞翼大小不一，建議政府加撥款，令雞翼餐由一份變兩份。據悉，有部分公務員喺WhatsApp群組話覺得Jeremy小題大做，為雞翼要佢哋做咁多嘢。咁到底隻雞翼大細差幾遠？
譚：膳食就係在囚者生活
Jeremy回覆時話係幫啲非政府機構（NGO）提問，佢哋收到好多在囚人士反映，雞翼大細參差得好緊要，但實際差幾遠就未見過嘞！佢坦言普通人未必好關注雞翼大細，但在囚人士喺監獄中冇乜嘢做，膳食安排就係佢哋嘅生活，「加份雞翼要使幾錢啫？」
佢覺得就算政府唔加錢，起碼會睇吓啲雞翼，可能係採購出現問題都唔定，亦有在囚人士反映，可唔可以唔使等大時大節都有「雞髀餐」食添！佢另就在囚人士牙科保健、每月探訪次數、家人見面室大小等提出問題，希望佢哋知道社會上有人關注佢哋嘅權益。