政情：學生憂上車無望 搵陳茂波算帳
學生時代應該係最無憂無慮嘅時候，但財政司司長陳茂波尋日同一班中學生大談財政預算案，就發現唔少學生擔心上車無望，更有人提到唔少人一滿十八歲就申請公屋，到底房屋問題有幾咁嚴重呢？
有學生批評陳茂波只着眼房屋供應，但忽略需求方面，因為每年有唔少年輕人年滿十八歲就立刻申請公屋，原因係對將來買到樓缺乏信心，認為政府要諗方法增加年輕人上車嘅信心囉！
陳茂波就話冇辦法阻住人申請公屋，要根治年輕人擔心買唔到樓而輪候公屋，就要從房屋供應着手，等佢哋知道供應陸續有嚟，需要時亦負擔到就唔會心急。
公廁緊要過教師壓力
另外，有學生關注教師壓力，批評政府寧願將資源投放喺公廁上，反問教師自殺係咪比唔上公廁重要。陳茂波就話對近日慘劇心痛，但未搵出事實前不宜評論。佢又強調公廁同教師自殺不能相比，重申唔會因而削減教育資源，仲話女同學急都唔願用公廁，所以改善公廁有需要喎！