政情：收料站：「法律之恥」鄭若驊屢遭玩殘 唔肯再接信
律政司司長鄭若驊上任以來劣評如潮，不但「放生黎智英，唔告梁振英」捱轟，民望更長期「墊司底」，而早前落區遇着香港眾志秘書長黃之鋒，則拒親自接收請願信，有建制派就認為係因鄭屢次遭玩殘所致。
日前鄭到訪南區區議會，遇到黃之鋒等人「恭候」，兩邊喺會議室內大玩麻鷹捉雞仔，最後相距只有一張枱嘅距離，但鄭仍然拒絕親自接收請願信，仲向其政務助理趙文軒話「阿軒同我收咗封信呀！」明顯係有所避忌。
收標語後木口木面
之不過，鄭喺上星期到訪中西區區議會時嘅態度截然不同，事關非常諷刺地親自接收身兼中西區議員嘅立法會議員許智峯嘅「法律之恥」標語，期間更木口木面甚為無癮。有建制派直指對中西區區議會當日嘅安排有問題，因為鄭若驊同行有其他職員，無理由要鄭親自接收有侮辱性嘅標語，加上場面混亂，流會好過繼續進行會面。
睇番當日會面只係進行十五分鐘就草草收場，都證明鄭選擇繼續並非正確喇！難怪只係過咗幾日，鄭遇黃之鋒就一改常態，搞到黃之鋒想親自交信都做唔到囉，難怪黃當日會話「（前律政司司長）袁國強都好過佢（鄭若驊）！」