政情：議員發功召喚星星 議辦廢電器即有人執
「四電一腦」計劃推出半年依然一塌糊塗，再有議員「召喚」環境局局長黃錦星出嚟執垃圾。民建聯（民記）中西區區議員楊學明早前好心「收留」咗一部廢棄雪櫃，但唯一屬政府指定嘅上門回收商歐綠保唔肯上門收，激到佢「紮紮跳」，揚言再冇人收就搬去特首辦喎。不過事態峰迴路轉，歐綠保尋日突然通知楊學明，話會「靈活處理」周末派人上門收雪櫃喎。
本周三下午楊學明喺社交網站發貼，講述由收雪櫃到同歐綠保「交手」嘅經過。佢話只係唔想件電器流落街頭，先叫街坊唔好丟喺街，搬入其辦事處內，及後再聯絡歐綠保，點知對方話因為議辦唔係住宅，要有四件電器先上門，仲反建議搬上樓先再Call佢哋。楊嬲到喺貼文內標籤咗黃錦星、副局長謝展寰同政治助理區詠芷「尋人」，而民記立法會議員陳克勤就留言「送去星星局長辦公室，歐綠保即刻收」。
楊學明：再唔得就搬去特首辦
楊尋日早上回覆查詢時話，同歐綠保「交手」四至五次，無一次成功，覺得政府唔識變通，依家香港單位咁細，邊個會有位放多一部雪櫃等人除舊，政策唔完善令部分私家後巷或大廈後樓梯都堆積舊電器。佢已就事件去信環境局，明言再唔得就搬去特首辦。至中午，楊學明報喜話收到歐綠保來電，局方叫佢哋靈活處理，本周六派人去搬走雪櫃，陳克勤就留言話自己發咗功。
陳克勤炮轟四電一腦做得差
發咗咩功？陳回覆時承認就事件搵過謝展寰同部分政府高層，以解決呢啲「可惡」事。佢話不時都收到黨友嘅相，見到通街廢電器冇人理，炮轟四電一腦政策做得好差，每年支付兩億元公帑畀歐綠保都收唔晒，覺得政府應該公平啲津貼埋其他回收商，就唔使有廢電冇人執。至於今次係特事特辦定長久政策？佢就話要問吓環境局，反指冇理由次次都要議員打電話先執。
據了解，四電一腦負評如潮，政府高層好注重各區「特別個案」，叫議員有乜嘢事可以同政府反映處理。政策做得差，要議員走「特別通道」先做嘢，咁普羅大眾又可以走乜嘢通道先有除舊呢？