中環出更：睇皮紋知性格 葉鎧沂幫夫妻「斷症」
睇掌預測運程就聽得多，皮紋學睇性格又聽過未？金紫荊女企業家協會（協會）尋日就邀請咗皮紋分析師葉鎧沂（Winnie）演講，佢話皮紋分析同睇掌兩樣嘢完全唔同，話風水師基本上係睇皮膚上嘅凹紋，而皮紋學就啱啱相反，係睇凸紋，屬解剖學上嘅一個分支，已有百幾年嘅科研歷史，用途係了解每個人嘅腦粒子嘅數量同分布，從而分析佢嘅性格同長短處，提供合適嘅建議。
Winnie話今時今日離婚率、學童自殺率高，加上好多人都有抑鬱症，背後原因可能就係唔了解配偶，或者去咗一個唔適合自己嘅環境發展，皮紋分析可以幫啲夫妻了解對方，雖然有啲缺點彼此已心知肚明，但由局外嘅專業人士提出，通常都更具說服力。不過，據知Winnie至今仲係單身，唔知會唔會影響佢嘅說服力？佢最初講笑話單身係因為睇完皮紋就可以「踢對方出局」，後尾再解釋話皮紋一定會睇，單身只係因為忙啫！
李凱琪請人或先分析皮紋
協會主席丘璟珊、常務副主席李凱琪（Clara）同章曼琪都在場，Clara之前都有聽過皮紋分析，聽完Winnie講後就更加想正式做一次分析，仲話應該同屋企人一齊做，因為最重要係改善關係，Clara直言有時都會唔明白仔女，希望做完分析後可有所改善。Clara仲諗到未來公司請人，特別係聘請高層時都可以考慮先做個皮紋分析，睇吓佢嘅性格、優點適唔適合先再決定咁話。
傑出青年協會前主席林景昇聽完都心郁郁，覺得可以帶埋老婆一齊試吓，但佢話無論分析結果係點都唔係最重要，認為兩公婆相處最重要都係有同理心，否則即使熟悉對方嘅性格但唔肯遷就的話，都依然會鬧交收場，所以一定要識得企喺對方嘅角度出發，嘗試了解多啲對方感受，咁先可以長久相處咁話。
卓妮