政情：咪兜直播中斷 陳凱欣老貓燒鬚
唔好以為做過傳媒，發布消息就一定無問題。做咗十幾年傳媒嘅立法會議員陳凱欣尋日下晝喺立法會咪兜開直播，點知開咗聲幾秒就中斷咗，真係老貓燒鬚呀！
陳凱欣下晝喺咪兜直播，講到想回應有關長者醫療券，之後就聽唔到嘞，重新整理網頁幾次，情況都係一樣，之後連直播嘅貼文都唔見埋。唔通係佢買嘅電話流動數據計劃網速太慢？
之後拍片擺上網補鑊
事後問番陳凱欣，佢就話平時喺室外先用電話嘅流動數據，喺立法會就會用立法會議員嘅WiFi，以往都比較穩定，助理知道直播中斷後，就唔再直播，變番正常拍片，仲話之後會將啲片擺上網補鑊喎。