政情：敗部復活重返議會 范國威謝偉銓唔敢再偷懶
尋日係立法會九龍西、新界東、港島區直選同建築界功能界別等議席補選一周年，翻查四位喺補選中當選嘅議員，喺呢一年立法會大會、內務委員會同財務委員會嘅出席率，其中「敗部復活」嘅新民主同盟范國威（Gary）同建築界謝偉銓（Tony），喺重返議會後比以前勤力咗，喺三個會議當中，兩人都只係缺席過一次。兩人重返議會後都唔敢偷懶，睇嚟敗選嘅教訓真係好大喇！
二人會議出席率大大改善
睇番Gary同Tony喺上屆立法會嘅表現，Gary喺大會同內會嘅出席率都試過百分之百，而出席率最低嘅就係二○一三至二○一四年度嘅財會，只得百分之八十二。至於Tony就差啲，喺上屆嘅三個主要會議中，出席率未試過百分之百，其中最低嘅係二○一五至二○一六年度嘅財會，只有百分之六十八。
截至尋日為止，Tony只係缺席過一次內會，大會同財會嘅出席率就達到百分之百，而Gary就只缺席過一次大會嘅特首質詢環節。佢接受查詢時就話唔清楚出席率嘅計法，當日喺會議廳外示威之後就要趕去區議會，所以缺席咗質詢環節喇。佢仲話幾經艱辛先重返議會，雖然區議會事務好忙，但都要珍惜機會，打醒十二分精神出席會議，仲希望日後可以保持到。至於Tony就話一直都以立法會嘅工作為先，但由於上屆不時要出外開會，同立法會撞晒時間，而重返立法會後，亦會盡量出席所有嘅會議。
同樣喺補選中勝出嘅民主派區諾軒同民建聯鄭泳舜（Vincent）嘅表現又點呢？區諾軒喺大會缺席過三次、內會缺席過兩次、財會就缺席一次。同樣地，佢所缺席嘅大會都係特首質詢環節，喺其後嘅會議佢都有出席。至於Vincent就出席晒所有大會，但喺內會同財會則分別缺席過兩次。
另外，睇番佢哋所申報嘅辦事處營運開支，Vincent申報喺舊年六月買咗吧枱同櫈，雖然係陳列品，但連埋送貨費，埋單都要成三千幾。佢喺申報時就標明，話係用嚟開會同做訪問用；區諾軒申報買咗一張近七百蚊嘅梳化，擺喺香港仔地區辦事處用，亦標明唔係用嚟瞓覺，而係用嚟坐。Tony同Gary都有為辦公室再增添設備，Gary花咗近八千蚊幫位於大圍嘅辦事處添置家具，包括會議枱、櫈同櫃桶等。