中環出更：兩個何啟明 議題都鬧雙胞
話說工聯會立法會議員何啟明同民協深水埗區議員何啟明撞名又撞樣，但政見立場就南轅北轍。不過如果喺街上見到兩人嘅橫額掛埋一齊，而且講嘅議題又一模一樣，唔知大家又分唔分到邊個打邊個呢？
橫額並排掛 標政黨區分
話說民協主席、黃大仙區議員施德來喺Facebook，上載咗一張兩個何啟明嘅橫額相，兩幅橫額唔止放埋一齊，仲要都係要求下調交通費補貼計劃門檻。雖然議題鬧雙胞，但細心一睇，工聯會係要求由依家四百蚊嘅門檻下調至三百蚊，而民協就要求不設門檻下限。施德來解釋，話補貼計劃係想減輕市民交通費用負擔，而基層工友嘅人工低，只會選擇短途交通工具嘅工作，所以認為補貼計劃唔應該設門檻。
大家再望真啲，其實喺民協嗰幅橫額上，何啟明個樣隔籬印咗「我係民協何啟明」，好明顯係怕人認錯係工聯會嘅何啟明，所以特登喺橫額上標明，等市民咪撈亂呀！
卓妮