中環出更：搞活動求安心 陳少棠搵風水師擇吉日
每個人都想自己條路順風順水，部分人就篤信命理，凡事都要風水師傅幫幫手睇睇。油尖旺區議員陳少棠早前出席活動時話，自己其實唔係好信風水，但都會尊重，而過往都有搵過風水師傅，如要搞一啲大型活動都會搵師傅幫手擇日揀個吉時，祈求順風順水。至於有冇用，佢就話，至少對佢嚟講係有效喎。
陳少棠日前出席一個義工嘉許活動時話，其所屬政團都有風水師傅幫手做義工，呢班師傅其實係相熟好友，所以有時都會搵佢哋幫手。不過佢就強調唔會事無大小都搵師傅睇，通常係有大型活動時先會叫師傅擇個吉日，求個安心啫。
張俊勇：風水係中國心理學
中華總商會常務會董張俊勇就話自己信風水，認為風水學係「中國心理學」，背後有佢嘅科學根據。不過佢雖然信風水，但就冇深入研究，亦冇搵師傅嘅習慣，所以無論營商、買樓定租辦公室，多數都係靠自己。佢解釋話，一嚟冇咁多時間研究，二嚟最多都只係行一條難行啲嘅路，冇咩所謂咁話。
而油尖旺撲滅罪行委員會主席陳香蓮就話自己信風水信到十足。佢話自己啱啱結婚時搬咗入新屋，之後好多病痛，特別係頸椎，當時一度想搬走，但一諗到花咗好多錢搞新居入伙就卻步，後來經朋友介紹下搵咗個師傅睇一睇，改動少少就搞掂，之後佢就每年都會搵師傅睇吓屋企同辦公室。不過咁咪要年年都大執一次？陳香蓮就話如果師傅功力夠，好多時都唔使大執，只要改動吓啲布局擺設就搞掂o架喇。
卓妮