公立醫院頻頻「爆廠」，由病床不足到醫護人員壓力爆煲，成個醫療系統可謂千瘡百孔。尋日輪到物理治療師團體出嚟控訴，稱五年嚟接受物理治療嘅門診及住院病人分別增長一成五及兩成，但係物理治療師人手卻「負增長」，有啲物理治療師一日要睇六十個病人，情況令人擔憂。所謂「屋漏偏逢連夜雨」，食物及衞生局局長陳肇始同埋醫院管理局主席梁智仁認真要諗吓計，否則就喺醫療史上徒留罵名喇！
