政情：三議員戙高腳 示範「武吃」烤肉
唔少香港人都鍾意食烤肉，多名立法會議員包括易志明、梁志祥同埋謝偉銓（Tony）最近就喺北京相聚，仲齊齊去咗食烤肉。Tony將啲相擺上Facebook，睇真啲，佢哋全部都企晒起身，拎住長筷子，又將餐巾披喺單邊膊頭上，究竟搞邊科？
根據Tony嘅講法，呢種食法叫「武吃」，即係企喺度之餘，仲要將一隻腳踩喺櫈上食，而對筷子就成三呎長，用嚟夾枱中間塊鐵板上嘅烤肉。佢話仲有一種叫「文吃」，不過就冇示範係點樣吃法喇！平時香港嘅烤肉店都係坐定定咁食，企起身踩埋櫈都真係幾新奇，睇見佢哋三人食到豎起晒拇指，相信都好享受喇！