政情：陳克勤爭取快巴變慢巴 黨友劉國勳做箭靶
新界人對於點對點直達嘅巴士訴求好大。一條由上水來回大埔那打素醫院嘅巴士線，由本月起，大埔返上水時由原本行高速公路嘅「快巴」，變成加多咗十幾個站嘅「慢巴」，結果引起兩區爭議。有指係民建聯（民記）新界東立法會議員陳克勤牽紅線，聯絡運輸及房屋局局長陳帆幫大埔居民爭取，令該黨另一立法會議員兼北區區議員劉國勳即變箭靶，畀北區市民點名炮轟！搞出個大頭佛，唔通佢哋事前冇協調過？
北區同大埔屬於同一個醫院聯網，部分專科要去大埔先有得睇，巴士公司喺去年就開設73B號循環線，往來港鐵上水站至那打素醫院，來回十八個站，但運輸署上月則公布該路線北行返上水改行大窩西支路，加多十六個站，全程變為三十四個站。「北區交通關注組」喺社交網站發貼，話係陳克勤聯絡陳帆成功令73B線改道，有北區區議員想喺區議會轄下嘅交通運輸委員會（交委會）提案反對，就畀委員會主席劉國勳拒絕，質疑劉有冇盡力捍衞北區街坊意見。
北區反加站 民記被質疑無溝通
有區議員透露，北區一直都反對改路，連民記區議員都係，唔明點解陳克勤要幫大埔某位經民聯區議員爭取，質疑民記內部冇協調。劉國勳就解釋，不時有巴士線改路都會涉及北區同大埔，已要求運輸署盡量平衡各方利益，而交委會唔批准提案只係按規矩辦事，佢都有建議議員喺其他事項提出。至於同陳克勤有冇夾過？佢就話大家經常溝通，亦有就事件反映意見喎！
陳：任協調人 望大家互相體諒
陳克勤回覆時話，黨內溝通機制非常良好，唔存在冇協調或爭功，笑言如果有咁大影響力叫得郁陳帆，依家交通服務就唔會咁差喇！佢承認聯絡陳帆同大埔區議員落區，但係屬於恒常做法，而佢一直擔當兩區協調人，促成大家坐低同運輸署傾，最後由署方同巴士公司落決定，慨嘆跨區線就係經常出現類似問題，兩區意見都係好，希望大家互相體諒。
另有北區區議員爆料話，去年底陳帆出席該區嘅交流會時，就話唔記得有答應過會改線，令北區議員心存一絲希望唔使加站。呢個說法係真定假就不得而知，但局長現身即「成功爭取」，市民有遐想亦不為過，下次局長勤力啲，去埋北區見市民聽民意就冇咁多誤會喇。