中環出更：鄭泳舜填申報表 頭銜「立法會議」
立法會議員可以申請發還開支津貼，本報翻查咗幾位喺上年立法會補選中當選嘅議員所申報嘅開支紀錄，發現喺舊年三月初九龍西補選勝出嘅民建聯鄭泳舜（Vincent），喺開支申報表上，連續兩個月都寫錯頭銜，分別變咗係「立法會議」同埋「立法會會議員」。咦，點解寫錯頭銜，自己都冇發現到嘅？
又寫錯「立法會會議員」
Vincent喺舊年三月同四月分別填報咗聘任議員助理嘅申報表，兩份申報表都寫錯頭銜。身為立法會議員嘅佢喺三月底填寫嘅申報表，身份就變身做「立法會議」，雖然喺四月底填寫嘅申報表寫番啱「議員」，不過就唔係「立法會議員」，而係「立法會會議員」！唔知係咪心急得滯寫錯咗呢？
對於寫錯頭銜一事，Vincent回應查詢時直認係手民之誤，仲話以後會多加留意添！
同樣都係來自九龍西補選，喺舊年十一月補選中勝出嘅食物及衞生局前政治助理陳凱欣，喺當選後就請咗四名議助，而佢出手都唔低，月薪最少都有二萬二千元，最高都有三萬九千元。而四名議助中，有兩名係由朋友介紹，另兩名就係以前嘅同事。除咗申報議助薪金，佢仲申領咗一筆超過七十三萬六千港元嘅營運資金，唔知又用嚟做啲乜嘢呢？
卓妮