中環出更：避開黃背心運動盧大川假期唔去巴黎
法國係好多城中名人嘅朝聖之地，但自從舊年十一月爆發黃背心運動以來，每逢周末示威者就上街抗議搞破壞，唔知名人點應對呢？早前喺一個藝術展上見到法國五月贊助人、名媛盧大川（Olivia），佢曾經喺法國讀書，講得一口流利法文，亦經常去法國。佢話黃背心運動確實令人困擾，但示威者通常係喺唔使返工嘅日子先至出嚟，所以只要避開假期去巴黎就得，法國南部都好好玩(口架)！
香港城市大學展覽館早前舉行一個裝飾藝術展，展示法國、香港及上海多間博物館同私人收藏家借出、逾三百件具代表性嘅裝飾藝術珍品。好喜歡文化藝術嘅Olivia、仁愛堂前總理何歐陽翠華同埋法國五月董事會主席阮偉文（Andrew）都有到場。講開巴黎亂象，Andrew都話示威者只係集中喺巴黎幾條街鬧事，影響唔係好大，只要唔去嗰度就冇事。
黃嘉純讚法國南部環境舒服
城大校董會主席黃嘉純都好喜歡法國，經常去法國南部玩，盛讚當地嘅自然環境好舒服。話時話，雖然佢嘅廣東話好流利，但望落硬係覺得「鬼鬼哋」，細問之下，原來佢外祖母嗰邊真係有西班牙血統喎。
城大校長郭位同籌辦展覽嘅城大展覽館總監范懿莎都喺度。郭位同法國都幾有淵源，當年喺美國讀書時修讀過法文，成日去法國，最近仲獲頒法國國家榮譽軍團騎士勳章，下周三將由法國駐港澳總領事官明遠代表頒授喇！
卓妮