政情：自嘲「仲未亡黨」民協急搵女將
近年好多政黨都年輕化，不斷吸納年輕「新血」，而喺九龍扎根多年嘅民協最近就搞咗年度春茗，仲喺春茗上高調話要「搵女」！事關民協已經三十三歲，雖然有幸「仲未亡黨」，但就陽盛陰衰，搞到該黨深水埗區議員覃德誠都講到明「民協最需要女！」誠邀有志嘅女將加入，最後仲加咗個hastag話靚女優先添！
退黨馮檢基都有來春茗
翻查資料，民協能夠走過三十三個年頭的確唔易，好似前年就曾經爆內訌而引起退黨潮，令原本喺二○一五年區議會選舉中贏得十八席嘅民協，大幅縮減至只剩十二席，仲要唔單止議席大減，民協喺過去幾年都離開咗唔少領頭人物，先有該黨前主席莫嘉嫻離開，及後連該黨元老、前立法會議員馮檢基都走埋，咁睇嚟民協自嘲話「仲未亡黨」似乎都唔係純屬講笑。
不過睇真啲，馮檢基雖然已離開民協，但佢都有出席今次民協春茗，睇嚟佢哋都仲係藕斷絲連喇！