中環出更：王桂壎自爆讀書時百厭成日打交
經常都聽到人講讀書嘅日子係最開心，通常都有好多難忘回憶，好似香港律師會前會長王桂壎就自爆讀書時「最多百厭嘢」，直言佢哋當年有「三打」，分別係「打Band、打波、打交」，話每個同學都一定會至少試過其中一項，而當時好流行打功夫，唔少同學都有學跆拳道、拳擊等，所以成日都有人打交，至於佢自己都有打Band，不過打得最多嘅都係打交！
百厭還百厭，王桂壎話同母校關係相當唔錯，雖然已畢咗業好多年，但間唔中都會返去影相，而且每當母校有活動時需要「吹雞」時，個個同學仔都會一齊返去幫手，直言佢哋個個都好長情，咁睇嚟王以前成日打交都係貪玩居多，骨子裏其實同學校、老師都好有感情，所以先會咁多年都仲有保持聯絡。
史立德貪玩 彈波子玩公仔紙
至於香港中華廠商聯合會副會長史立德就話讀書時都好鍾意玩，但當時物質冇咁富裕，所以只可以彈吓波子、拍吓公仔紙，但佢都試過抄功課、測驗出貓，好彩嘅係冇畀人捉到！不過無論點百厭，佢話自己都一定會好尊敬老師，所以就算老師要打手掌、罰坐無影櫈都好，佢都一定乖乖哋照做。佢又提到早幾年曾經讀番書，覺得係享受，而小時候讀書就係一件苦差咁話。
香港鐘表業總會前主席梁青華就最乖喇，事關佢話幾十年前讀書時乜都冇，物質當然同今時今日冇得比，而佢亦冇依家啲學生咁好創意同想像力。至於畢業時有冇啲有創意嘅搞作，佢話只記得搞咗場簡單嘅謝師宴，正正經經咁請老師食飯，席間有啲乜嘢環節、表演，因為年代久遠都唔係好記得嘞！
卓妮