政情：14歲留學即拍拖 高鼎國同太太係初戀
好多城中名人鍾意送仔女出外留學，細細個就喺學校或寄宿家庭獨自生活，都咪話唔驚小朋友學壞。香港鐘表業總會前主席高鼎國（Geoffrey）中學就出國讀書，佢就自爆當年都「學壞」咗，就係十四歲開始拍拖。咦？太太張尹馨（Grace）知唔知道呢個秘密o架？佢大大聲笑住話，初戀情人咪就係太太囉！
原來兩人當年喺同一間學校讀書，Geoffrey都係太太嘅初戀情人。雖然佢哋咁後生，其實由拍拖至今，兩人已經廝守約四分之一世紀，稱得上「老夫老妻」嘞！唔知有乜嘢貼士為愛情「保鮮」呢？Grace話最緊要保持心境開朗，Geoffrey就話讓自己保持繁忙狀態，咁就唔會諗太多嘢。
不過屋企瑣事多，若有分歧時邊個話事？Grace話以前係佢話事，依家就由老公話事多啲。Grace笑稱，媽媽係台灣人，所以性格溫柔啲，咪由得老公做一家之主囉！