政情：李鋈麟冀政府撥地 給予商界捐建院舍

全港逾2000殘障者輪候

最近因為感冒菌入侵三叉神經線而致右邊面癱嘅李鋈麟繼續戴住口罩現身，但都肯應要求除低口罩影張靚相，佢笑笑口話病情愈趨好轉，仲話小病是福喎。

呢間院所係為十五歲以上有能力過半獨立生活嘅殘障人士而設，最大特色係讓舍友透過唔同類型嘅生活技能訓練，提升獨立生活能力。院舍提供三十一個宿位，同目前全港仲有二千幾人輪候相比，都只係杯水車薪。李鋈麟就話社會有好多善心人士想施予援手，但前提係要有場所，否則冇地方，商界捐錢都冇用。

佢仲形容呢間中心係最先進嘅「示範單位」，唔止全自動化，仲有音樂室等功能設施同綠化空間，唔會好似牢籠咁困住院友。未來仲有好多大型公共屋邨落成，佢希望政府撥出一定比例嘅場地，大家齊齊為縮短輪候人龍努力。