政情：馮興禮廿幾歲人先戒奶

原來Henry喺外國讀書時成日肚痛，一直都唔知係乜嘢引致，回港後先發現問題係源自飲奶，所以就開始「戒奶」嘞，時至今日可謂「滴奶不沾」。佢仲話細個時身體比較能承受奶類飲品，但大個咗開始唔得，好彩嘅係飲珍珠奶茶就冇事，聽落都算有口福喇！

踢爆徐英偉每朝飲可樂

撇除奶類，Henry話食嘢好少跟健康餐單，冇刻意少油鹽糖，事關佢恃住自己運動量大，又跑步又打網球又打西洋拳，每個星期至少都有兩日做運動，所以唔使特別戒口，雖然間唔中都要出街食飯應酬，但消耗量夠大所以都應付到。查實Henry話平時放工多數都返屋企食飯，油鹽糖都一定比出街食低，整體都算食得健康。

講起注重飲食同健康，佢仲大爆上司、勞福局副局長徐英偉最唔健康，唔單止有痛風，仲要每朝都飲一罐可樂，話唔飲唔精神咁話。