中環出更：「靚女」喻海濱 梁美芬促先辟臭狐
政府打算斥資六十億元發展維港海濱長廊，但多區海濱都被投訴「臭海」氣味強烈，搞到市民對海濱避之則吉。立法會議員梁美芬（Priscilla）尋日喺一個委員會會議上就話，歡迎政府搞海濱，不過「如果靚女有臭狐」就感覺唔同嘞！其實，Priscilla係以靚女比喻海濱，以臭狐比喻強烈氣味，希望當局做好啲清潔工作幫海濱醫病。
認定當局冇立項處理
Priscilla話海濱規劃爭取咗十幾年，終於等到政府做，而佢平時經常去荃灣碼頭、九龍東、土瓜灣、紅磡同大角咀海濱，海水氣味好強烈，認為發展海濱配合海水冇臭味先係完美、一個真正嘅政績。
點解決臭味先？財爺陳茂波就話會同相關政策局講番情況，Priscilla就笑言即係要同環保局追數，認定當局實冇立項處理。
卓妮