中環出更：香港肥仔芬蘭畢業 黃麗芳笑似聖誕老人
香港菁英會尋日舉行一年一度新春媒體午宴，講吓嚟緊嘅多項大計，當然唔少得一如以往喺暑假會搞嘅實習計劃，菁英會副主席黃麗芳（Yvonne）講起，舊年實習計劃，有個喺芬蘭畢業嘅香港「肥仔」參加。芬蘭最出名係聖誕老人，Yvonne都話呢個「肥仔」成個聖誕老人咁，大讚佢幾可愛。
Yvonne話感覺芬蘭讀書嘅人會比較隨意，但呢個「肥仔」就唔係咁，執得好四正。講起「肥仔」，身形有啲分量嘅執委陳迪源就話聽到有人叫「肥仔」，佢就會應，原來因為榮譽主席洪為民（Witman）成日都叫佢做「肥仔」，訓練到佢一聽到有人講「肥仔」就會應。
Witman就講起舊年嘅實習計劃，試過香港有個修讀法律嘅學生去前海嘅法院做書記，幫手打判詞，真係相當特別。講起前海嘅法院，佢講起自己都曾經做過前海嘅法院入面嘅陪審員，處理嘅全部都係有關商業糾紛嘅案件，原來佢喺香港反而唔會有份做陪審員，事關佢做過法律援助服務局嘅成員。
曾鳳珠係共享單車受害者
另一名副主席何玉慧就講起，菁英會喺四月四日星期四，邀請咗中國殘疾人藝術團嚟文化中心表演，檔期近復活節，預訂場地都有困難，好彩咁啱有人唔要個場，就成功「執死雞」嘞。佢又話今次呢個藝術團最少十幾年冇嚟香港表演，自己事先有去內地睇過佢哋演出，真係相當感動，今次籌辦都喺藝團身上學到好多嘢，原來藝團會安排唔同殘疾嘅成員一齊住，令成員之間可以互相照顧。
轉個頭又見到常務副主席曾鳳珠，佢講起自己係共享單車嘅受害者，以往都有用共享單車，冇踩一段時間後，突然睇新聞見到間公司執咗笠，按金白白冇咗嘞，不過都唔算好多錢，所以費事追討嘞！
卓妮