政情：公民講場：食環署建築署唔協調 公廁衞生差到爆

本港公廁衞生差到爆，有政黨尋日公布咗十大最差男女公廁，直指現時公廁由食環署管理，建築署負責維修，兩個部門運作時間唔協調，令維修時間拖長，好唔理想。梗係唔理想喇，公廁衞生差嘅問題唔係今日先爆出嚟，一直無改善擺明就係食環署署長劉利群監管不力，而建築署署長林余家慧又唔幫手補位，加快維修，搞到香港變咗臭港，嚇壞旅客，若果公廁臭出國際嘅話，兩個署長肯定孭鑊。