政情：怕內地客逼爆南區 區諾軒提動議阻宣傳
喺港珠澳大橋同埋高鐵通車後，內地旅客逼爆咗多個非景點地區，影響市民生活。早前有人引述政府消息，話計劃對外推廣去港島南區旅遊，但就惹起當區區議員不滿，南區區議員柴文瀚聯同身兼當區區議員嘅立法會議員區諾軒，將喺下月七日嘅區議會大會上提出動議，要求避免過分推廣南區旅遊。
憂人滿為患 冇晒區內特色
旅發局早前發表工作計劃時就講過，發掘緊新地區加入「香港大城小區」計劃，同埋發展「香港後花園」計劃。柴文瀚同區諾軒所提出嘅動議，指目前介紹南區旅遊途徑已經足夠，為免太多旅客阻礙居民生活，因此反對旅發局鼓勵過多遊人到訪。佢哋仲話，由於鴨脷洲同田灣街窄路短，每日已經有大量旅行團出入，阻礙路面交通，影響居民生活，擔心過分宣傳會令人滿為患，冇晒區內特色。
本身南區已有海洋公園呢個熱門遊客景點，柴、區亦喺動議中提出，海洋公園應該要按《海洋公園公司條例》嘅精神，以本地客比例過半為目標，集中為港人提供教育同康樂設施。